ამა წლის 17 მაისს გამართა სასტუმრო “შერატონ ბათუმის” გახსნის ცერემონიალი, რომელსაც ესწრებოდნენ საქართველოს პრეზიდენტი მიხეილ სააკაშვილი, თურქეთის პრემიერ-მინისტრი რეჯებ ტაიპ ერდოღანი, აჭარის მთავრობის თავმჯდომარე  ბატონი ლევან ვარშალომიძე, სამთავრობო სტრუქტურის ხელმძღვანელები, თურქეთის დელეგაცია, საქართველოს საერთაშორისო ინვესტორთა ასოციაციის წარმომადგენლები. ხუთვარსკვლავიანი სასტუმრო 203-ნომრიანია და ექსპლუატაციაში 2010 წლის გაზაფხულზე შევიდა. `შერატონი ბათუმი` თურქული ინვესტიციებით აშენდა და მფლობელი ცნობილი ბიზნესმენი ნურეთთინ ჩარმიკლია. გახსნის ცერემონიალზე  თურქეთის პრემიერ-მინისტრმა რეჯებ ტაიპ ერდოღანმა სიტყვით გამოსვლის დროს ხაზი გაუსვა ორი ქვეყნის თანამშრომლობის მნიშვნელობას და განაცხადა შემდეგი: ““ყველაზე მნიშნვნელოვანი ის არის რომ აჭარაში დაწყებული მშენებლობის ბუმი არ უნდა შეჩერდეს და ამას ხელს თავად კომპანია “ნუროლი საქართველო” შეუწყობს. ჩვენ თანამშრომლობის მრავალწლიანი გამოცდილება გვაქვს საბაჟოსა და აეროპორტის ერთობლივად გამოყენების კუთხით და თანამშრომლობა სამომავლოდაც გაგრძელდება”. საქართველოს პრეზიდენტმა განაცხადა: “ამ პატარა ქალქში იქნება ყველა მთავარი ბრენდი სასტუმროებისა. აქ იქნება უფრო მეტი მსოფლიო დონის სასტუმრო, ვიდრე ნებისმიერ სხვა ადგილზე”- და დასძინა, რომ სწორედ ბათუმში იქნება 21-ე საუკუნის ერთ-ერთი საუკეთესო არქიტექტურა მსოფლიოში. საქართველოს საერთაშორისო ინვესტორთა ასოციაცია ულოცავს ასოციაციის წევრს “ნუროლ საქართველოს” აღნიშნული პროექტის დიდი წარმატებით განხორციელებას.

მიმდინარე წლის 16–17 მაისს ბათუმს სტუმრობდა თურქეთის ცნობილი კორპორაციული ჯგუფის „აღაოღლუს“დელეგაცია, რომელსაც ხელმძღვანელობდა ფირმის მმართველთა საბჭოს თავმჯდომარე ცნობილი ბიზნესმენი ალი აღაოღლუ. მათ მასპინძლობას უწევდა აჭარის მთავრობის თავმჯდომარის კაბინეტი, ფინანსთა და ეკონომიკის სამინისტრო და საქართველოს საერთაშორისო ინვესტორთა ასოციაცია.  1981 დაარსებული სამშენებლო ფირმა დღეს 15 კომპანიას აერთიანებს და ერთ–ერთი ცნობილი და წარმატებული ჯგუფია თურქეთში, რომელსაც განხორციელებული აქვს რამოდენიმე მილიარდიანი პროექტი. კომერციული ჯგუფის აღაუღლუს დაინტერესების სფეროს წარმოადგენს ჰიდროელექტრო კაშხლების მშენებლობა, სასტუმრო ქსელი და საბინაო მშენებლობა.

მიმდინარე წლის 10 მაისს საქართველოს საერთაშორისო ინვესტორთა ასოციაციას სტუმრობდნენ საქართველოს საკარიერო სერვისის (CSG) პროექტის ხელმძღვანელი დოქტ. ირმა წერეთელი და აჭარის ტურიზმის ასოციაციის (ATA) პროექტების კოორდინატორი ბ–ნი ზვიად დიასამიძე. შეხვედრაზე საქართველოს საერთაშორისო ინვესტორთა ასოციაციის გენერალურ მდივანთან ბ–ნ თამაზ შავაძესთან ერთად მათ განიხილეს სამომავლო ურთიერთობების ჩამოყალიბებისა და მისი გაღრმავების პერსპექტივები. CSG წარმატებით ახორციელებს გერმანიის ეკონომიკური თანამშრომლობისა და განვითარების სამინისტროს (BMZ) ინიციატივით დაარსებულ პროექტს, რომელიც ითვალისწინებს სამშობლოში გერმანიიდან დაბრუნებული პროფესიული კადრების დასაქმებას.

ამა წლის 6 მაისს გაიმართა საერთაშორისო ინვესტორთა ასოციაციის მმართველთა საბჭოს მორიგი სხდომა, რომელზეც განხილული იქნა შემდეგი საკითხები:

1.      აჭარის ა/რ მთავრობის თავმჯდომარესთან ბ-ნ ლევან ვარშალომიძესთან და საინვესტიციო პოლიტიკის დეპარტამენტის უფროსს ზაზა გუმბერიძესთან შემდგარ შეხვედრებზე დასმული საკითხების ირგვლივ მიმდინარე მუშაობის შედეგები;

2.      ასოციაციის წევრების, წევრობის პოტენციური კანდიდატების და ხელისუფლების უფლებამოსილი პირების ერთობლივი ვახშამის მოწყობის ორგანიზება;

3.      ახალი ფირმების გაწევრიანებაზე ერთობლივი ძალისხმევის გაძლიერება;

4.      საწევროების გადახდის მდგომარეობა;

5.      შპს “Doruk Nut and Food Company” გარიცხვა წევრობიდან;

6.      სასტუმრო შერატონთან გაფორმებული ფასდაკლებითი ხელშეკრულების შესახებ ინფორმაცია;

7.      ტუბერკულოზის საავადმყოფოს თხოვნის საკითხი დახმარებაზე.

8.      GPI Holding სადაზღვეო კომპანიის გაწევრიანების გადაწყვეტილების მიღება;

9.      შპს “ორცვას” გაწევრიანების გადაწყვეტილების მიღება;

10.  ინფორმაცია ასოციაციის თანამშრომლების მუშაობის შესახებ და პრემიების საკითხი;

11.  სხვადასხვა საკითხები.

სხდომას ესწრებოდნენ მართველთა  საბჭოს წევრები.

"ახალი ტექნოლოგიების დემონსტრირება აგროსამრეწველო სექტორში" - ამ სახელწოდებით აჭარის სოფლის მეურნეობის სამინისტროს მიერ ორგანიზებული ორდღიანი ფორუმი სასტუმრო "ინტურისტ პალასში" გაიხსნა. ფორუმის ფარგლებში აგრარული სფეროთი დაინტერესებული პირები გაეცნობიან თანამედროვე ტექნოლოგიებს მეფრინველეობის, თევზის გადამამუშავებელი კომპლექსის, სანერგე მეურნეობის მიმართულებით.
კონფერენცია აჭარის მთავრობის თავმჯდომარემ გახსნა და ფორუმის მონაწილეებს წარმატებები უსურვა.
კონფერენციაში უკრაინული, ჰოლანდიური, ლატვიური, გერმანული და სხვა უცხოური კომპანიების 12 წარმომადგენელი, აგრეთვე ადგილობრივი მეწარმეები და ფერმერები მონაწილეობენ.
ფორუმის მიზანია აგროსამრეწველო სფეროში მოქმედ საერთაშორისო და ადგილობრივ მწარმოებლებს საშუალება მიეცეს წარმოადგინონ ახალი ინოვაციები აგროსამრეწველო სფეროში, მოახერხონ ინფორმაციის გაცვლა და ახალი კონტაქტის დამყარება. 

ვეტერინარულ კონტროლს დაქვემდებარებული პროდუქციის იმპორტის ტრანზიტზე და ფიტოსანიტარულ კონტროლს დაქვემდებარებული მცენარეული წარმოშობის პროდუქციის იმპორტზე ნებართვების გაცემა უკვე სურსათის უვნებლობის,ვეტერინარიისა და მცენარეთა დაცვის სამსახურშია შესაძლებელი.ლევან ვარშალომიძის განცხადებით, ეს დაზოგავს მეწარმეთა დროს და ფინანსებს. "აქამდე იმპორტიორებს, ბიზნესმენებს, სოფლის მეურნეობის სფეროში მომუშავე ფერმერებს აღნიშნული სერთიფიკატების ასაღებად თბილისსა და ფოთში უხდებოდათ ჩასვლა, უკვე ნებართვების გაცემა ბათუმში შეეძლებათ", - აღნიშნა აჭარის პირველმა პირმა. პირველი სერთიფიკატი აჭარის მთავრობის თავმჯდომარემ ფერმერთა სახლის ხელმძღვანელს პირადად გადასცა.

საქართველოს მთავრობის კანცელარიაში ლევან ვარშალომიძისა და მთავრობის წევრების შეხვედრა გაიმართა. აჭარის მთავრობის თავმჯდომარის განცხადებით, შეხვედრაზე გადაიჭრა ყველა ის პრობლემატური საკითხი, რომელიც რეგიონთან დაკავშირებით არსებობდა. მისივე თქმით, ძირითადი პრობლემები იყო დოკუმენტაციის ხელმოწერასთან და სერტიფიცირების საკითხებთან დაკავშირებით. ამასთან, როგორც ლევან ვარშალომიძემ აღნიშნა, ცენტრალურ ხელისუფლებასთან შეხვედრები კვარტალში ერთხელ გაიმართება. 
"შეხვედრაზე ვისაუბრეთ პრობლემატურ საკითხებზე. გადაწყდა, რომ აჭარის მოსახლობასა და მეწარმეებს გარკვეული დოკუმენტაციისთვის თბილისში ჩამოსვლა არ მოუწევთ. კონკრეტული საკითხები არსებობდა სერტიფიცირებასთან დაკავშირებით, მაგალითად იმისთვის, რომ ადგილობრივმა მეწარმემ გაიტანოს მანდარინი, აიღოს ნებართვა მეურნეობის წარმოებაზე, ნებართვა თბილისიდან იყო საჭირო. შეხვედრები იქნება მუდმივი", - განაცხადა ლევან ვარშალომიძემ.
შეხვედრას საქართველოს ეკონომიკური განვითარების მინისტრი ზურაბ პოლოლიკაშვილი, ენერგეტიკის მინისტრი ალექსანდრე ხეთაგური, სოფლის მეურნეობის მინისტრი ბაკურ კვეზერელი, ფინანსთა მინისტრი კახა ბაინდურაშვილი, გარემოს დაცვისა და ბუნებრივი რესურსების მინისტრი გოგა ხაჩიძე, აგრეთვე, “საქაერონავიგაციის” ხელმძღვანელი გიორგი კარბელაშვილი დაესწრნენ, ხოლო აჭარის ავტონომიური რესპუბლიკის მთავრობიდან – კულტურის მინისტრი მათე ტაკიძე, სოფლის მეურნეობის მინისტრი ემზარ ძირკვაძე, ფინანსთა მინისტრი ვაჟა ბოლქვაძე, ჯანდაცვის მინისტრი ლევან ანთაძე.
ლევან ვარშალომიძემ აჭარისთვის ადმინისტრაციული უფლებამოსილების დელეგირების მინიჭების საკითხი რამდენიმე დღის წინ გამართულ ბრიფინგზე დააყენა.

ლევან ვარშალომიძემ გამართულ ბრიფინგზე აჭარისთვის ადმინისტრაციული უფლებამოსილების დელეგირებასთან დაკავშირებით ისაუბრა. აჭარის მთავრობის თავმჯდომარემ განაცხადა, რომ რეგიონისთვის ცალკეული ადმინისტრაციული უფლებების გამიჯვნა რამდენიმე პრობლემას ერთდროულად მოაგვარებს. "ეს გაამარტივებს მომსახურეობას და შექმნის საფუძველს უფრო ეფექტური გადაწყვეტილებები მიიღონ ადგილზე", - განაცხადა ლევან ვარშალომიძემ.

როგორც ბრიფინგზე აჭარის მათვრობის თავმჯდომარემ აღნიშნა, კონკრეტულად საქმე ეხება აჭარის საჯარო სკოლების დირექტორების დანიშვნას, ასევე ფერმერებისთვის საჭირო სერთიფიკატების გაცემას და სხვა ტექნიკური ხასიათის საკითხებს, რომელთა შესახებაც გადაწყვეტილებას რეგიონის მინისტრთა კაბინეტი ვერ იღებს.

"ხაზგასმით მინდა ვთქვა, რომ ჩვენ უფრო მეტ ავტონომიას კი არ მოვითხოვთ, არამედ ჩვენ მოვითხოვთ გვქონდეს უფრო მეტი საშუალება უკეთ განვახორციელოთ ჩვენი ავტონომიური უფლებები", – განაცხადა ლევან ვარშალომიძემ. მთავრობის თავმჯდომარემ ცენტრალურ მთავრობას მიმართა საკითხი საგანგებო თათბირზე განიხილოს.

ამა წლის 1 აპრილს გაიმართა შეხვედრა სამშენებლო ფირმებისა და SGS ჯგუფის (მსოფლიოს წამყვანი კომპანია შემოწმების, ტესტირებისა და სერტიფიცირების დარგში) წარმომდგენლებს შორის საქართველოს საერთაშორისო ინვესტორთა ასოციაციის ოფისში. შეხვედრას ასევე ესწრებოდნენ საერთაშორისო ინვესტორთა ასოციაციის თავმჯდომარე ჯემალ ბილგინგულლუოგლუ და გენერალური მდივანი თამაზ შავაძე. დღესდღეობით SGS ჯგუფს დაფუძნებული აქვს მთვარი ოფისი ჟენევაში, ხოლო ფილიალები მთელ მსოფლიოში. სტამბულში არსებული ფილიალიადან აწარმოებს მომსახურებას სომხეთში, აზერბაიჯანში და უახლოეს მომავალში გეგმავს მომსახურების დანერგვას საქართველოში, კერძოდ ბათუმში. SGS ჯგუფი მომავალ პარტნიორებს სთავაზობს მომსახურების მთლიან პაკეტს, რომელშიც შედის ხარისხის, დროისა და ხარჯების ოპტიმიზაცია, სამუშაოების ეფექტური დაგეგმარება, რესურსების მენეჯმენტი, ტენდერის მენეჯმენტი, კონტრაქტის მენეჯმენტი და ა.შ. SGS ჯგუფი დასრულებული შენობებისათვის გასცემს საერთაშორისო სერთიფიკატს, რომლის მეშვეობითაც ადვილდება კრედიტის მიღება საერთაშორისო ბანკებიდან. შეხვედრის მონაწილეთათვის გაიმართა SGS ჯგუფის პრეზენტაცია, რის დასრულების შემდეგ სამშენებლო კომპანიის წარმომადგენლებს მიეცათ საშუალება დაესვათ შეკითხვები და მიეღოთ პასუხები მათთვის საინტერესო საკითხებზე.

საქართველოს ეკონომიკური განვითარების მინისტრი ზურაბ პოლოლიკაშვილი და აჭარის მთავრობის თავმჯდომარე ლევან ვარშალომიძე საერთაშორისო ინვესტორთა ასოციაციის წევრებს შეხვდნენ. საუბარი სამომავლო პროექტებს შეეხო. ლევან ვარშალომიძემ შეხვედრაზე რეგიონში არსებულ საინვესტიციო გარემოზე ისაურა. აჭარის მთავრობის ხელშეწყობით მალე ბათუმში საქართველოს ეროვნული საინვესტიციო სააგენტოს ფილიალი გაიხსნება. ზურაბ პოლოლიკაშვილმა აქცენტი იმ ექსპერიმენტულ პროექტზე გააკეთა, რომლის განხორციელებასაც უახლოეს მომავალში გეგმავს. მინისტრმა პროექტში ჩართვა ასოციაციის წევრ ბიზნესმენებს შესთავაზა. ექსპერიმენტული პროექტი კი საქართველოს საზღვრებს გარეთ მცხოვრები ქართველი ბიზნესმენების მიერ სამშობლოში ინვესტიციის დაბანდებას ითვალისწინებს.