აჭარის მთავრობის თავმჯდომარე ზურაბ პატარაძე  თურქეთის საგარეო ეკონომიკური ურთიერთობების საბჭოს (DEIK) წარმომადგენლებს შეხვდა. DEIK-ის წარმომადგენლები საქართველოში სამუშაო ვიზიტით იმყოფებიან. შეხვედრას ასევე ესწრებოდნენ აჭარის სოფლის მეურნეობის მინისტრი ლაშა კომახიძე, აჭარის ფინანსთა და ეკონომიკის მინისტრი რამაზ ბოლქვაძე, აჭარის ფინანსთა და ეკონომიკის მინისტრის მოადგილე სულხან ხალვაში და აჭარის მთავრობის საერთაშორისო ურთიერთობების დეპარტამენტის უფროსი ხათუნა ნაყეური. თურქეთის დელეგაციას DEIK-ის თურქეთ-საქართველოს ბიზნეს-საბჭოს თავმჯდომარე ჯემალ იანგინი ხელმძღვანელობდა. შეხვედრას ასევე ესწრებოდნენ თურქეთის გენერალური კონსული ბათუმში იასინ თემიზქანი, საქართველოს საერთაშორისო ინვესტორთა ასოციაციის გენერალური მდივანი ოსმან ჩალიშქან (მჟავანაძე) და სხვა წევრები.  შეხვედრაზე აღინიშნა, რომ თურქეთი საქართველოს უმნიშვნელოვანესი სავაჭრო პარტნიორია. ასევე ხაზი გაესვა ინვესტიციებისა და ტურიზმის მიმართულებით რეგიონში უკვე მიმდინარე პროექტებს და მომავალში ამავე სფეროებში თანამშრომლობის პერსპექტივებსაც. შეხვედრის მონაწილეებმა ასევე ისაუბრეს იმის შესახებაც, რომ თანამშრომლობის გაღრმავებას საქართველოსა და თურქეთს ბიზნეს-სექტორებს შორის რეგიონის ეკონომიკური განვითარებისთვის უდიდესი მნიშვნელობა აქვს. შეხვედრაზე აჭარის მთავრობის თავმჯდომარემ ზურაბ პატარაძემ მწუხარება გამოთქვა თურქეთის რესპუბლიკაში ბოლო პერიოდში გახშირებული ტერაქტების გამო და თურქეთის ხელისუფლებისა და ხალხის მიმართ თანადგომა გამოხატა.n“თურქეთი ჩვენთვის პარტნიორი ქვეყანაა და მნიშვნელოვანია ის პროექტები,რომლებიც ხორციელდება დღესდღეობით ჩვენს რეგიონში. დაიგეგმა ბიზნეს ფორუმების გამართვა. ჩვენ მაქსიმალურად ვართ დაინტერესებული თურქი ინვესტორების შემოსვლით ჩვენს რეგიონში. განვიხილეთ მიმდინარე და მომავალი პროექტები. მე ვფიქრობ ეს ძალიან მნიშვნელოვანი შეხვედრაა რაც ხელს უწყობს ჩვენს ქვეყნებს შორის ეკონომიკური ურთიერთობების განვითარებას” - განაცხადა ზურაბ პატარაძემ შეხვედრის დასრულების შემდეგ.